பரிசு

இன்று உன் பிறந்த தினம்..
இன் தமிழ் வார்த்தை தேடி
உன்னை நான் வாழ்த்தவென
உள்ளத்தில் ஆசை கோடி

ஆனாலும் நெஞ்சில் ஏனோ
ஆழமாய் சோக கீதம்
நித்தமும் மகிழ்வாய் வாழும்
நிரந்தரம் இல்லை இங்கு

யுத்தமும் போர்க்களமும்
ரத்தமும் சதையுமென்று
நித்திரை தானுமின்றி
நித்தமும் வேகுகின்றோம்

யாழ் குடா நாடு தன்னில்
பாழ் பட்ட ஊரடங்கு
காழ்ப்புடை போர்ப்படைகள்
காட்டிடும் காடைத்தனம்

பிஞ்சுடல்கள் பிளக்கின்ற
பெரும் குண்டின் ஓசைகளும்
பெற்றவர் அருகிருந்து
புலம்பிடும் காட்சிகளும்

தொலைவினில் வெடியோசை
தொலைந்தது நிம்மதியும்
தலைவிதியை நொந்து தினம்
தலைமோதி அழுகின்றார்

இத்தனைக்கும் மத்தியிலும்
எப்படி நான் உனை வாழ்த்த
என் அன்பு சகோதரனே
என் உணர்வு புரிகிறதா

இனம் மதம் யாவும் தாண்டி
இன்னுயிர் எண்ணிப்பார்
இளைய நம் தலைமுறையின்
இன்னல்கள் எண்ணிப்பார்

வன்முறை வாழ்வு தன்னில்
வதங்கிடும் குருத்துக்களின்
வருங்காலம் எண்ணுகையில்
வருத்தமே தோன்றுதடா

சிந்தை நான் கலங்கியதால்
சிந்திடும் விழி நீர்கள்
தந்தேன் பரிசாக -உன்
சிந்தனைக்கு ஏற்றுக் கொள்

	Tweet